Қазақстан Республикасының жалпы орта білім беретін ұйымдары «ҚАЗАҚСТАН-2050» СТРАТЕГИЯСЫ: бір халық – бір ел – бір тағдыр» атты бірегей тақырыпта Білім күнін өткізеді

1 Қыркүйек, 2013 00:00

1 қыркүйек. Астана. Бүгін еліміздің 2,5 млн. оқушысына алғашқы қоңырау соғылып, жаңа оқу жылы басталмақ. Қазақстан Республикасы Білім және ғылым министрі Б.Т. Жұмағұлов Астана қаласындағы № 60 мектеп-лицейдің Білім күніне арналған салтанатты линейкасына қатысады.

Қазақстан Республикасының жалпы орта білім беретін ұйымдары «ҚАЗАҚСТАН-2050» СТРАТЕГИЯСЫ: бір халық – бір ел – бір тағдыр» атты бірегей тақырыпта Білім күнін өткізеді. Сабақтың мазмұны Қазақстан Республикасының Президенті – Ұлт Көшбасшысы Нұрсұлтан Назарбаевтың «Қазақстан-2050» стратегиясы: қалыптасқан мемлекеттің жаңа саяси бағыты» атты Қазақстан халқына Жолдауы, елордамыз Астананың 15 жылдығы, «Экспо 2017» Халықаралық көрмесі сияқты еліміздегі бірқатар қоғамдық маңызы бар оқиғаларды қамтитын болады.

Елбасы Нұрсұлтан Әбішұлы Назарбаев Қазақстан халқына арнаған Жолдауында елді білімге бастайтын басым бағыттарды айқындап берді. Білім беру саласында айтарлықтай тың өзгерістер орын алуда, білім беру жүйесінің барлық буынында жаңғырту саясаты жүргізілуде.

Елбасының халқына арнаған Жолдауы аясында биылғы жаңа оқу жылы еліміздің білім беру саласына салмақты жауапкершілік жүктеліп отыр. Мәселен, мектеп бағдарламаларына «Абайтану», «Алаштану» сияқты оқу курстары енгізілді. Сонымен қатар, биылғы жылы бірінші сыныптан бастап ағылшын тілі оқытылады. Осы жылдан бастап жан басына қаржыландыру жүйесін енгізу қолға алынды. 12 жылдық білім беру жүйесіне дайындық аса қарқынды түрде жүргізіліп келеді. Республиканың көптеген мектептерінде Назарбаев Зияткерлік мектептерінің тәжірибесі енгізілуде. Еліміздің 12 мыңнан астам мұғалімдері кәсіптік біліктілігін арттырған жаңа біліктілікті арттыру жүйесі жолға қойылды.

1 қыркүйекте білім беру ұйымдарында дәстүрлі түрде 2013-2014 жаңа оқу жылының басталуына арналған салтанатты линейкалар, барлық деңгейдегі әкімдердің, білім беру органдары өкілдерінің, педагогикалық еңбек ардагерлерінің, қоғамдық ұйымдар өкілдерінің қатысуымен өтеді.

Білім күні мектеп оқушыларын 292 067 педагог қарсы алады. 265177 бірінші сынып оқушылары алғашқы рет мектеп табалдырығын аттайды. Бұл күні республиканың 9 өңірінде: Алматы, Ақтөбе, Шығыс Қазақстан, Жамбыл, Батыс Қазақстан, Қызылорда, Маңғыстау, Оңтүстік Қазақстан облыстарында және Алматы қаласында жаңа білім беру ұйымдарының объектілері ашылады. Жыл аяғына дейін 159 жаңа мектеп іске қосылады.

Республикамызда 300 мың педагог оқушыларды білім нәрімен сусындатып, ел тізгінін ұстайтын азаматтарды тәрбиелеуде. Олардың қатарына тағы 10 мыңнан астам жаңа маман келеді деп күтілуде.

Барлық жаңалықтар