ОҚО-да балабақша мен мектеп ашылды

Бүгінге дейін ыңғайластырылған ғимаратта білім алып келген қарнақтық оқушылар келесі оқу жылынан бастап зәулім де сәулетті мектепте оқып, тәрбиеленуге мүмкіндік алды. 300 орынға есептелінген үш қабатты нысанда заманауи химия, физика, информатика кабинеттері мен асхана, спорт және мәжіліс залы бар, деп облыс әкімдігінде хабарлады.

Шараға арнайы келген облыс әкімінің орынбасары Сәкен Қаныбеков пен Кентау қаласының әкімі Әбдібақыт Мақұлбаев оқушылар мен ұстаздарды және ауыл тұрғындарын бүгінгі қуаныштарымен құттықтады. Ауыл ақсақалдарымен бірге сынып бөлмелерін аралап көргеннен кейін басшылар осы ауылда бой көтерген сиымдылығы 140 орындық балабақшаның ашылу салтанатына қатысты. Жүздері бал-бұл жанған бүлдіршіндер әуелетіп ән салып, құлпыра би билеп қарнақтық тұрғындар мен қонақтарға мерекелік көңіл-күй сыйлады.