• Басты
  • Жаңалықтар
  • Ұлттық кеңес мүшелері дайындаған ұсыныстардың негізгі бөлігі іске асты – Е.Қарин

Ұлттық кеңес мүшелері дайындаған ұсыныстардың негізгі бөлігі іске асты – Е.Қарин

27 Мамыр, 2020 11:30
Ұлттық кеңес мүшелері дайындаған ұсыныстардың негізгі бөлігі іске асты. Бұл туралы Президент кеңесшісі Ерлан Қарин онлайн өтіп жатқан Ұлттық қоғамдық сенім кеңесінің үшінші отырысында мәлімдеді, деп хабарлады Strategy2050.kz тілшісі.
«Елімізде төтенше жағдай режимі енгізілгенге қарамастан, Ұлттық кеңес мүшелері ауқымды жұмыс жүргізді. Ең алдымен Мемлекет басшысының екінші отырысында берген тапсырмаларын іске асыру бойынша тапсырмаларға белсене қатысты. Берілген тапсырмаларды іске асыру мақсатында Президент әкімшілігінің басшысы 21 тармақтан тұратын арнайы іс-шаралар жоспарын бекіткен болатын. Осыдан кейін мемлекеттік органдар мен Ұлттық кеңес мүшелері бірлесе отырып тапсырмаларды іске асыруға кірісті. Әсіресе, заң жобалары бойынша жұмыс топтарындағы талқылауларға қатысу кеңес жұмысының негізгі бөлігін құрады», - деді ол.

Ол атап өткендей, кеңес мүшелері бейбіт жиналыстар, саяси партиялар, сайлау туралы заң жобалары бойынша жұмыс топтарының отырыстарына қатысып, өздерінің ұсыныстарын беріп отырған.

«Жалпы алғанда мұндай 20 талқылау өткізілді. Сонымен қатар, кеңес мүшелерінің қатысуымен Парламентте басқа да заң жобалары қарастырылды. Кеңес мүшелері дағдарысқа қарсы жұмыстың түрлі бағыттарына да тартылды», - деді Е.Қарин.

Сондай-ақ,Е.Қарин кеңестің әр мүшесі атқарған жұмыстарды жекелеп тізіп берді.

«Ол жұмыстардың нәтижесінде Мемлекет басшысы Ұлттық кеңестің екінші отырысында берген тапсырманы іске асыру бойынша іс-шаралар жоспарының 11 бағыты толық іске асты. Оған қоса, бірқатар заңнамалық актілердің жобалары Парламентте талқылаудан өтуде. Сондықтан да Ұлттық кеңес мүшелері дайындаған ұсыныстардың негізгі бөлігі іске асты», - деді ол.
Барлық жаңалықтар