Қазақстан Республикасының Мемлекеттік Туын алаңға ҚР мемлекеттік күзет қызметінің тобы алып шықты.

ҚР қорғаныс министрі Сәкен Жасұзақов «Оңтүстік», «Шығыс», «Астана», «Батыс» өңірлік қолбасшылықтарының парадқа қатысушыларын, десанттық-шабуылдау әскерін, сондай-ақ арнайы операциялар күштерінің барлау топтарын, әскери қызметтегі әйелдерді және басқа әскерлерді Қарулы Күштердің 25 жылдығымен және Жеңіс күнімен құттықтады.

Командирдің салтанатты құттықтау сөзі Отанды қорғау ісіндегі әрбір жауынгердің маңыздылығын мойындау болып қалады. 

Сәкен Жасұзақов Жоғарғы Бас Қолбасшы Нұрсұлтан Назарбаевқа қатысушылардың парадқа дайындығы туралы баяндады. 

Осыдан кейін, ҚР Президенті қатысушыларды ғана емес, сонымен қатар Қазақстанның барлық тұрғындарын осы айтулы мереке – Қарулы Күштердің 25 жылдығымен салтанатты түрде құттықтады.

Әдеттегідей, жаяу бағаналардың өтуін барабаншылар ротасы ашты. Биыл алғаш рет барабаншылар қатарында Астана, Алматы, Қарағанды және Шымкент қалаларының «Жас Ұлан» әскери мектептерінің үздік өкілдері болды.

Құрлық әскерлері – қазақстандық армияның соққы беретін күші. Оларға мотоатқыш, танк, десанттық-шабуылдау және артиллериялық құралымдар, сондай-ақ теңіз әскері бригадасы жатады.

Әскери-теңіз күштері еліміздің теңіз шекараларын сенімді қорғап, өздерінің әскери және кәсіптік шеберліктерін үнемі жетілдіріп отырады, оны Каспий теңізіндегі оқу кезінде бірнеше мәрте дәлелдеген де еді.

Сондай-ақ, «Шығыс» өңірлік қолбасшылығының әскери қызметшілері де қатармен шықты. Бұл құрылым әскерінің негізін кез келген қарсыласқа қарсы тұра алатын танк және артиллериялық құрамалар құрайды.

Олардың соңынан еліміз үшін аса маңызды Каспий маңы өңірінің қауіпсіздігін қамтамасыз ету міндеттерін орындайтын «Батыс» өңірлік қолбасшылығының әскерлері өтті.

Сондай-ақ, парадқа арнайы операциялар күштерінің барлау бөлімі топтары да қатысты. Барлаушы-жауынгерлер үнемі жоғары кәсіби біліктілігімен және кез келген шұғыл жағдайда іс-қимыл жасай білуімен ерекшеленген. 

Тұрғындар әскери қызметші әйелдерді ерекше қарсы алды. Қазақ халқының әйгілі қыздары Әлия Молдағұлова мен Мәншүк Мәметованың ерліктерін қазіргі заман буыны абыроймен жалғастырып келеді. Олар өздерінің әскери борыштарын ерлермен қатар атқарып жүр. 

Шеруді одан әрі бітімгерлік күштердің, арнайы мақсаттағы, әскери полицияның, аумақтық қорғаныс бригадасының, Құрлық әскерлері әскери институтының офицерлері жалғастырды. 

Тұрғындар механикаландырылған бағана құрамындағы қару-жарақ пен әскери техниканың ең соңғы және заманауи үлгілерін өз көзімен көре алды. 

Парадтың авиациялық бөлімі ерекше болды – астана тұрғындары мен қонақтары Әуе әскері күштерінің ең заманауи ұшу аппараттарын басқаратын қазақстандық ұшқыштардың шеберлігін бағалады.

Ұшқыштар Астана көгінде мерейтойлық «25» санын және «Бәйтерек» жоғарғы пилотаж пішінін көрсетті.

Қазақстанның армиясы – халқымыз бен еліміздің күші. Бүгінде барлық әскерлер – Қарулы күштер – жер бетінде, аспанда және теңізде Отан алдындағы борышын атқара отыра, азаматтарымыздың бейбіт өмірін сақтап келеді.

Ақбота Күзекбай

Фото Бауыржан Жуасбаев