Қала әкімі Ахметжан Есімов Алматының еліміздің ең ірі мегаполисі екендігін, сондықтан Құтқару қызметінің арнайы техникалармен, қазіргі заманғы қондырғылармен қамтамасыз етілуі маңызды екендігін жеткізді.

«Ми-8АМТ жаңа тікұшағы төтенше оқиғалар кезінде алғашқы көмек көрсетуді мүлктіксіз орындау үшін өте қажет. Болашақта Алматының Құтқару қызметінде тікұшақтар саны артатын болады», - деді Ахметжан Есімов.

Алматы қаласы Құтқару қызметіне берілген Ми-8АМТ тікұшағы Улан-Удэнің авиация зауытында құрастырылады, ол «Вертолеты России» холдингінің құрамында, келісім 2013 жылы жасалған. Машина қосымша қондырғылармен жабдықталған, соның арқасында іздеу-құтқару, адам мен жүк тасымалдау жұмыстары жүзеге асады.