Парламент Мәжілісінің баспасөз қызметі хабарлағандай, бұл канадалық парламентшілердің екіжақты дипломатиялық қатынас тарихында біздің елімізге алғашқы сапары. Делегация құрамында Сенат пен қауымдар Палатасының, сондай-ақ, аталған елдің заңнамалық органына кіретін Канаданың негізгі саяси партияларының өкілдері бар.  

«Тараптар сауда-экономикалық, мәдени-гуманитарлық ынтымақтастық аясындағы ауқымды сұрақтарды талқылай келіп, алдағы уақытта табиғи ресурстар, ауылшаруашылығы, уран индустриясы, денсаулық сақтау, білім және ғылым салаларында өзара іс-қимыл әлеуетінің зор екендігіне тоқталды», - делінген хабарламада.

Осы ретте Мәжіліс Төрағасы атом энергиясын бейбіт жолда пайдалану саласында қазақстандық-канадалық қатынастың стратегиялық маңызын атап өтті.   

Меймандар біздің еліміздің индустриялық-инновациялық бағдарламасына қызығушылық танытты.  

Халықаралық мәселелерге де айрықша назар аударылды.

Кездесу иелері Орталық Азияда тұрақтылық пен қауіпсіздікті қамтамасыз етуде  екі елдің ортақ қадамдарын тілге тиек етті.

Сондай-ақ, келешекте де екіжақты қарым-қатынасты одан әрі сындарлы дамытуға ынталылық білдіре келіп, осы жолда заңнамалық органдар арасындағы парламенттік достық топтарының айрықша үлес қосатынына сенім білдірді.