Рүстем Исаев айтып өткендей, барлық ақылы болатын жолдар  12 жол учаскесін қамтиды. Оның ішіндегі бас жол – Батыс Қытай-Батыс Еуропа – транзиттік дәлізі.

«Кей жолдар қайта жөндеуден өтті, салынуда. Қазір ақылы қылу бойынша Астана-Теміртау бағытындағы учаскеде жұмыс жүргізілуде. Қазір Жібек Жолы ауылына жақын жерде  төлем жасау пункті орналасқан. Екінші төлем жасау пункті Теміртау қаласынан басталмақ.  Алматы-Қапшағай, Алматы-Қорғас жолдары бойынша жұмыс жүргізілуде.  Бұл жолдар  2018 жылы  ақылы болады», - деді Рүстем Исаев.

Бүгінгі таңда ақылы жолдарды енгізу бойынша кешендік шаралар жүргізілуде.

«Астана –Щучье  - өзара төлемнің гибридтік жүйесі. Ол дегеніміз не? Ақылы учаскеден шығарда кедергілер , шлагбаум тұрады. Ақшаны төлеген соң, ол ашылады.  Осы сияқты «Астана-Теміртау», «Алматы-Қапшағай», «Алматы-Қорғас» учаскелері  өзгертіледі. Қазір жүк көліктерінен бастап жеңіл машиналарға дейін төлем енгізу мәселесі  әзірленуде», - деді ол.

Спикер «Астана-Щучье»  учаскесіне қатысты жол бекетінің қызметіне тоқтады.

«Астана-Щучье учаскесінде жайлылық деңгейін көтеру мәселесі тұр. Бүгінгі таңда аталмыш учаскеде  26 абаттандырылған нүкте бар. Жыл соңына дейін қосымша жұмыс атқарылып, тағы  4 нысан қосылады», - деді Р.Исаев.

Ақбота Күзекбай

Фото Азамат Әлиев