«Отырыста Мемлекет басшысының  «Нұрлы жол – болашаққа бастар жол» атты Қазақстан халқына биылғы Жолдауын жүзеге асыру үшін Ұлттық қордан бөлінетін қаражатты пайдалану жолдары талқыланды», - деп хабарлады Ақорданың баспасөз қызметі.

Нұрсұлтан Назарбаев жаңа экономикалық саясат аясында ауқымды жұмыс күтіп тұрғанын атап өтті.

«Экономика өсімінің қарқынын бәсеңдетуге, халық арасында жұмыссыздықтың белең алуына жол бермеу үшін біз жаңа бағдарламаны іске қостық. Әлемде қалыптасқан ахуал жағдайында сырттан келетін қаражат экономика үшін жеткіліксіз. Сондықтан біз Ұлттық қордың қаражатын пайдалануды ұйғардық. Жаңа экономикалық саясатты жүзеге асыруға үш жыл бойы жыл сайын 3 миллиард доллар бөлінеді. Сонымен бірге халықаралық қаржылық ұйымдардың несие желілері, сондай-ақ былтыр бөлінген 1 триллион теңге бар. Осы қаражаттарды жұмсау механизмін нақты айқындау керек», – деді Қазақстан Президенті.