Парламент

Сенат спикері Алматы облысының аграрийлерімен кездесті

Қазақстан Республикасы Парламенті Сенатының Төрағасы Қайрат Мәми Алматы облысындағы Қазақ егіншілік және өсімдік шаруашылығы ғылыми-зерттеу институтында болды. Бұл туралы ҚР Парламенті Жоғарғы палатасының баспасөз қызметі хабарлайды.
Алматы05 Сәуір , 00:00

Спикер институт ғалымдарымен және ауыл шаруашылық өнімдерін өндірушілермен кездесті. Шара парламентшілердің еліміздің аймақтарына дәстүрлі сапары аясында өтті.

Кездесуде агроөнеркәсіп саласын дамытудың маңызды мәселелері, оның ішінде ғылыми-зерттеу жұмыстарын жүзеге асыру және инновациялық жаңалықтарды енгізу жайы талқыланды.

Қ.Мәми заң шығару қызметінің қазіргі кезеңдегі басымдықтары туралы әңгімелеп, «Қазақстан-2050» Стратегиясын заңнамалық тұрғыда қолдау шараларына жан-жақты тоқталды. «Қазақстан Парламенті алдын ала ұзақ жылдарға бағдарланған сапалы заңдар қабылдауды көздейді және заң шығару процесін жетілдіру жөніндегі өз жұмысын алдағы уақытта да күшейте түседі», - деп атап өтті Сенат Төрағасы.  

Кездесуде сондай-ақ басқаруды орталықсыздандыру, еліміздің аймақтарын, әсіресе ауылдық жерлерді дамытудың әлеуметтік-экономикалық аспектілері туралы сөз болды.

Шараға Алматы облысының әкімі Аңсар Мұсаханов, сенаторлар Лаззат Тұрлашов, Нұрлан Сүлейменов, Мәжіліс депутаттары Әлихан Тойбаев және Николай Логутов қатысты.

Ғылыми-зерттеу институтында болған кезде парламентшілер ауыл шаруашылығы саласының өнімдерінің көрмесін аралады. Ғалымдар өздерінің жаңалықтары және ізденістерімен таныстырып, сұрыптау ісіндегі табыстары бойынша зияткерлік меншіктері туралы әңгімеледі.




Яндекс.Метрика