Адами капитал

Ф. Оңғарсынованың шығармашылығы қазақстандықтардың жадында мәңгі сақталады – Н. Назарбаев

Мемлекет басшысы көрнекті ақын, қоғам қайраткері Фариза Оңғарсынованың қайтыс болуына байланысты туған-туыстарына көңіл айту жеделхатын жолдады, деп Ақорданың баспасөз қызметі хабарлады.
Астана қаласы24 Қаңтар , 12:40

 Мемлекет басшысы Фариза Оңғарсынованың ұлттық поэзиямызға өзгеше леп әкелген ерекше дарын иесі екенін атап өткен.

«Оның қаламынан туындаған нәзік те отты жырлар әрдайым халқымыздың жан-жүрегін еріксіз баурап алатын. Оның өлеңдерінен өзіне тән өр мінезі, өршіл рухы, адам жанының терең қалтарыстарына жіті үңіліп, соны таң қаларлықтай шеберлікпен аша білетін қуатты талант тегеуріні айқын сезіліп тұратын. Сондықтан да Қазақстан халқы ақиық ақын, тамаша журналист және еліміздің көрнекті қайраткерін ерекше қадірледі», – делінген жеделхатта.

Жеделхатта ақынның қоғам дамуына қосқан ерекше еңбегі үшін Қазақстанның жоғары мемлекеттік наградаларына ие болғаны атап өтілген. Сондай-ақ, халқымыздың өзіне көрсеткен зор сенімі арқасында Фариза Оңғарсынова Парламент Мәжілісінің депутаты болып сайланған.

Соңында Мемлекет басшысы ақынның есімі ұмытылмайтынына, ал оның шығармалары Қазақстан халқының жадында әрдайым сақтала беретініне сенім білдірген.      

 




Яндекс.Метрика