Экономика

Өнеркәсіп саласында 100-ге тарта ірі және орта кәсіпорын қызметін жүргізуде

Астанада тау-кен металлургиялық саладағы 70-тен аса отандық жеткізуші компанияның басын қосып отырған «Қазақстандық өнім жасаймыз» жыл сайынғы форумы өтуде.
Нұр-Сұлтан 23 Қараша, 17:20

Іс-шара ҚР Инвестициялар және даму министрлігі, «Kazakhmys Holding» ЖШС, «Еуразиялық Топ» ЖШС, «KazZinc» ЖШС, KAZ Minerals Тобы және «Қазақалтын» ТКМК» АҚ-ның қолдауымен өткізілуде.

Биылғы Форумға 600-ден аса делегат қатысуда, олардың қатарында қазақстандық тауар өндірушілер, тау-кен металлургиялық кешен (ары қарай - ТКМК) компаниялары, шағын және орта бизнес субъектілері, сондай-ақ, орталық және жергілікті атқарушы мемлекеттік органдардың өкілдері бар.

Іс-шара ұйымдастырушыларының атап өтуінше, Форумды ТКМК компанияларының қатысуымен өткізу отандық тауар өндірушілерімен ынтымақтасудың маңызды мәселелерін талқылау үшін жаңа форматты ұсынады. Сондай-ақ, Форум энергия тиімділігін ұлғайту және жеткізілетін өнімнің өзіндік құнын төмендетуге арналған жаңа шешімдермен, жобалармен таныстыруға мүмкіндік жасайды.

Форумның ашылуына құрметті қонақтар, атап айтқанда, ҚР инвестициялар және даму жөніндегі бірінші вице-министрі Алик Айдарбаев, ҚР инвестициялар және даму вице-министрі Тимур Тоқтабаев қатысты.

Іс-шара кезінде тау-кен металлургиялық саладағы жергілікті мазмұн көрсеткіштерін сапалы деңгейде ұлғайту мәселесі көтерілді, атап айтқанда,  ТКМК-дегі қазақстандық мазмұнға шолу жасалып, оң тәжірибелерді және жеткізушілердің алдында тұрған қиындықтар, сондай-ақ, қатысушылардың импорт алмастыру мәселелеріне қатысты көзқарасы ашық талқыға салынды.

 «Тау-кен металлургиялық кешен Қазақстан экономикасының бәсекеге қабілетті және қарқынды дамып келе жатқан секторларының бірі болып табылады. Осы өнеркәсіп саласында 100-ге тарта ірі және орта кәсіпорын қызметін жүргізуде. Аталған кәсіпорындар машина жасау, химиялық және жеңіл өнеркәсіп, құрылыс материалдарын өндіру сынды басқа салалардағы әлеуетті жеткізушілерді едәуір тапсырыс көлемімен қамтамасыз етеді. Мәселен, тау-кен кешеніндегі жер қойнауын пайдаланушылар және жүйе түзуші кәсіпорындар отандық өндірушілерден 995,7 млрд. теңгеге тең жалпы сомаға тауарлар, жұмыстар мен қызметтерді сатып алған, бұл жалпы сатып алудың 43,5%-ын құрайды. Басқаша айтқанда, отандық өндірушілер үшін ішкі нарықта үлкен әлеует және өндіріс көлемін ұлғайу үшін кең мүмкіндіктер бар», - деді А.Айдарбаев.

Пленарлық сессияның соңында форум ұйымдастырушылары - «Kazakhmys Holding» ЖШС, «Еуразиялық Топ» ЖШС, «KazZinc» ЖШС, KAZ Minerals Тобы және «Қазақалтын» ТКМК» АҚ топ-менеджменті Жергілікті мазмұнды дамыту аясында өзара ынтымақтасу жөнінде меморандумға қол қойды. Меморандум тараптардың тауарлар, жұмыстар мен қызметтерді сатып алу кезіндегі жергілікті мазмұнды дамыту аясындағы ынтымақтастығын кеңейтіп, қатынасын нығайтуды көздейді.

«Импорт алмастыру стратегиялары» атты панельдік сессияда еңбек өнімділігін арттыруға және аумақтық кластерлерді дамытуға бағытталған мемлекеттік қолдау шаралары жөнінде пікірталас ұйымдастырылады. Осы тақырып жөнінде «Қазақстан индустриясын дамыту институты» АҚ басқарма төрайымы Әлия Арыстанбаева сөз сөйлейтін болады. Сессия кезінде отандық өнеркәсіптік кәсіпорындардың бәсекеге қабілеттілігін дамыту және жергілікті мазмұнды дамыту шараларын дайындау мақсатында мемлекет пен жеке бизнестің бірлесе жұмыс жүргізу мәселесі ортаға салынады.

Қалыптасқан дәстүрге сай Форум аясында отандық өнімді шығаратын кәсіпорындар мен жеткізушілердің көрмесі өтуде. Жергілікті жеткізушілер серіктестермен тікелей кездесуге, келіссөздер өткізуге, өз өнімдерін таныстырып, ақысыз негізде клиенттерді табуға мүмкіндік алып отыр. Ұйымдастырылып отырған көрме отандық тауар өндірушілердің әлеуетімен, жаңа өндірістермен және шығарылатын тауарлар тізімдесімен таныстыруға арналған.

 





Яндекс.Метрика