Инновациялық Қазақстан - 2020 мемлекеттік бағдарламасы

Бірыңғай байланыс орталығы күніне 10 мыңнан 15 мыңға дейін қоңырау қабылдайды

Ағымдағы жылдың басынан бастап 1414 Бірыңғай байланыс орталығына (ББО) бір миллионнан астам қоңырау түсті – күніне 15 мыңға жуық қоңырау. Ал өткен 2015 жыл бойынша жүгіну саны тәулігіне шамамен 10 мыңды құрады. Бұл ретте өткен жыл ішінде байланыс орталығы операторларымен 4 миллион қоңырау қабылданды, деп хабарлады «Ұлттық ақпараттық технологиялар» АҚ баспасөз қызметі.
Казахстан29 Наурыз , 11:36

Азаматтар көбінесе Ішкі істер министрлігі (18,9% қоңырау), Әділет министрлігі  (17,7%), Денсаулық сақтау және әлеуметтік даму министрлігі (14,5%), Инвестициялар мен даму министрлігі (14,1%) мен Білім және ғылым министрлігі (11,2%) сияқты мемлекеттік органдардың қызметтерін жиі алады.

Осылайша, мысалы 2015 жылы хабарласқандардың 200 мыңнан астамы төлқұжат немесе жеке куәлікті алу мәселелері бойынша сауал қойды, 130 мыңға жуық қоңырау зейнетақы төлемдері жайында түсті, басқа 130 мыңға жуық қоңырау тұрғылықты жер бойынша тіркелу жайында түсті.  

Ең жиі қойылатын сауалдардың ішінде жүргізуші куәлігін беру - 95 мыңнан астам, бала тууға және оны күту бойынша жәрдемақыны тағайындау – 80 мыңнан астам, жеке тұлғаны мемлекеттік тіркеу – 80 мыңға жуық.

«Қазіргі таңда азаматтардың көбі мемлекеттік қызметтерді онлайн түрде алады, сондықтан біз электрондық цифрлық қолтаңбаны (ЭЦҚ) қалай, қай жерде алуға болатыны туралы көп сұрақ қабылдаймыз. Өткен жылы біз ЭЦҚ туралы 320 мыңнан астам сауалға жауап бердік» - деп «Ұлттық ақпараттық технологиялар» АҚ ББО әдістеме бөлімінің бастығы Ақмарал Ерғалиева хабарлайды.  

Естеріңізге салсақ, 1414 бірыңғай байланыс орталығы 2013 жылы «Ұлттық ақпараттық технологиялар» АҚ call-орталығы негізінде құрылды. Қазақстан Республикасы Үкіметінің 2013 жылдың 18 қыркүйегіндегі № 983 «Мемлекеттік қызметтер реестрін бекіту туралы» қаулысына сәйкес 694 мемлекеттік қызмет бойынша кеңес береді. 2016 жылдың соңына дейін бұл тізімді тағы 45 қызметке ұзарту жоспарланған.




Яндекс.Метрика