Саламатты Қазақстан мемлекеттік бағдарламасы

Н.Назарбаев Президенттің іс басқармасының медициналық орталығын ашты (ФОТО)

Астанада Елбасы Президенттің іс басқармасының медициналық орталығының Клиникалық оңалту кешенінің ашылу рәсіміне қатысты.
Астана қаласы 18 Наурыз, 13:15

Кешен құрамына бірегей диагностикалық блок және ядролық медицина бөлімшесі кіреді. Ғимарат пен оның инфрақұрылымының жұмысын қамтамасыз ететін негізгі жүйелердің мониторингі мен басқарылуы автоматтандырылған.

«Қазақстандықтар ем алу үшін шетелге барады. Осындай кешендердің пайда болуымен медициналық туристер легі біздің елге бағыт алатын болады. Мұнда толыққанды жұмысқа қажетті жағдайдың бәрі жасалған, енді сіздерге өз міндеттеріңізді сапалы орындап, халық денсаулығын жақсарту керек», – деді Мемлекет басшысы.

13 ғимаратты қамтитын, бір ауысымда 1000 адам қабылдайтын 4 емханасы, 35 құрылымдық бөлімшесі, сондай-ақ 200 орындық стационары бар кешеннің жалпы аумағы  84 мың шаршы метр болады. Кешен бөлімшелері озық медициналық техникалармен жабдықталған.

Мекемеде жоғары білікті мамандар, соның ішінде 24 медицина ғылымдарының 11 докторы мен 24 кандидаты жұмыс істейді. Дәрігерлердің жартысынан астамы жоғары санатқа ие. 

«Тиісті кәсіби персоналы, жоғары сапалы жабдықтары, қажетті секциялары түгел функционалды ғимараты бар медициналық мекеме барлық заманауи талаптарға сай», - деді Н.Назарбаев.

Мекеме қызметкерлері Нұрсұлтан Назарбаевқа денсаулық сақтау саласын дамыту мәселелеріне назар аударып отырғаны үшін алғыс айтып, осындай бірегей кешенде жұмыс істеу зор құрмет екенін әрі жауапкершілік жүктейтінін атап өтті. Олар халыққа білікті медициналық көмек көрсетуге дайын екендіктеріне Қазақстан Президентін сендірді.Сондай-ақ, аурухана ұжымы Елбасыға заманауи кешенді салуға ұйытқы болғаны үшiн алғысын бiлдiрді. 

Индира Қауметова

 

 





Яндекс.Метрика